أبيـــــات جميـــــلة

مال الرفيق إلا رفيقه إذا أعتاز

إما كذا ولابلاش الرفاقه

احدٍ لنا في مكسر الساق معكاز
وحنا له المعكاز في كسر ساقه

و بعض العرب اسكب على صحبته قاز
احرق غلاه ولايهمك فراقه

***

الله يجازي من يسوي سواتك
وبذنوب من سوا سواتك يجازيك

مشيت درب الثقل و تحب ذاتك
ما تدري انه للمهالك يوديك

وغرك جمالك يا خسارة حلاتك
ما تدري إن ما غير طبعك يحليك

بتقول زينك يشفع لسيئاتك
الحسن ماهو عن وفا الحب يعفيك

لو التواضع و الوفا من سماتك
بعت الحبايب كلهم دين و اشريك

لكن عجزت أغيرك يا جراتك
على الغياب اللي بلا عذر ينجيك

خطاي في توضيح وش هي غلاتك
وخطاك في توضيح وشو تغليك

وشلون توصيني و تنسى وصاتك
و تصد عن صوتن تقطع يناديك

ما فاتك التجريح والعذر فاتك
و تبغي رضاي الحينما عاد يمديك

صحيح أحبك بس هذي جزاتك
بعلمك درسن يفيدك و يحييك

تدري وش أبيض من خفوقك عباتك
وتدري وش اللي غرني نظرتي فيك

أدري بتستغربتصبر و جاتك
قصيدة من واحدن كان يبغيك

و تبغي تناظر و انت عايش مماتك
شف وحدتك و الناس تجلس حواليك

وتبغي تشوف أشجع رجل في حياتك
شفني وأنا مقفي على كثر ماغليك

للشاعر / محمد بن فطيس

صح لسانك والسانه